នារសៀលថ្ងៃចន្ទ ៤រោច ខែចេត្រ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី០៦ ខែមេសា ឆ្នាំ២០២៦ ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានទទួលជួបសំណេះសំណាលជាមួយ Dr. Chris Jacohson សាស្រ្តាចារ្យ មកពីសាកលវិទ្យាល័យ Queensland ដើម្បីពិចារណាក្នុងការស្វែងរកលទ្ធភាពក្នុងកិច្ចសហការការស្រាវជ្រាវនាពេលអនាគត។ គោលបំណងសំខាន់នៃជំនួបនេះរួមមាន៖ សក្ដានុពល៖ ការបង្ហាញពីសក្ដានុពល និងចក្ខុវិស័យរបស់វិទ្យាស្ថានគរុកោសល្យបាត់ដំបង។ កិច្ចសហប្រតិបត្តិការ៖ ស្វែងយល់ពីគ្នាទៅវិញទៅមក និងពិនិត្យក្នុងការស្វែងរកលទ្ធភាពក្នុងកិច្ចសហការការស្រាវជ្រាវនាពេលអនាគត។

នាថ្ងៃទី៦-៧ ខែមេសា ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំសិក្ខាសាលា ស្តីពី "ការអនុវត្តស្វ័យវាយតម្លៃផ្អែកលើលទ្ធផលការងាររបស់មន្ត្រីអប់រំនៃវិទ្យាស្ថានគរុកោសល្យបាត់ដំបង" ក្រោមអធិបតីភាពរបស់ ឯកឧត្តមបណ្ឌិត ជា រដ្ឋានាយកវិទ្យាស្ថាន ដោយមានការអញ្ជើញចូលរួមពីសំណាក់គណៈគ្រប់គ្រង និងមន្ត្រីអប់រំទាំងអស់នៃវិទ្យាស្ថាន។ សិក្ខាសាលានេះ ជាឱកាសដ៏វិសេសវិសាលរបស់វិទ្យាស្ថានក្នុងការផ្សព្វផ្សាយ និងណែនាំអំពីគោលការណ៍នៃការអនុវត្តស្វ័យវាយតម្លៃផ្អែកលើលទ្ធផលការងារ ព្រមទាំងការបំពេញបែបបទស្វ័យវាយតម្លៃសម្រាប់បុគ្គលិកអប់រំគ្រប់រូបក្នុងឆ្នាំសិក្សា ២០២៥-២០២៦ នេះ។ ក្នុងឱកាសបើកសិក្ខាសាលា ឯកឧត្តមបណ្ឌិតនាយកវិទ្យាស្ថាន បានគូសបញ្ជាក់ពីគោលបំណង និងសារៈសំខាន់មិនអាចខ្វះបាននៃសិក្ខាសាលានេះ ដែលជាផ្នែកមួយជួយដល់បុគ្គលិកអប់រំផ្ទាល់ ក៏ដូចជាជួយដល់ថ្នាក់ដឹកនាំក្នុងការរៀបចំផែនការអភិវឌ្ឍវិជ្ជាជីវៈជាប្រចាំ (CPD) ដែលឆ្លើយតបទៅនឹងតម្រូវការជាក់ស្តែងរបស់គ្រូឧទ្ទេស និងស្របតាមផែនការយុទ្ធសាស្ត្ររបស់ក្រសួងអប់រំ យុវជន និងកីឡា។ បន្ទាប់ពីកិច្ចប្រកាសបើកជាផ្លូវការ លោកស្រីបណ្ឌិត ទេព វណ្ឌី នាយិការងវិទ្យាស្ថាន បានដឹកនាំអង្គសិក្ខាសាលា ដោយធ្វើបទបង្ហាញយ៉ាងក្បោះក្បាយ ដើម្បីឱ្យបុគ្គលិកអប់រំគ្រប់រូបយល់ច្បាស់អំពី៖ ✅ តួនាទី ភារកិច្ច ឋានៈ និងស្តង់ដាវិជ្ជាជីវៈរបស់គ្រូឧទ្ទេស ✅ ការណែនាំអំពីការប្រើប្រាស់ឧបករណ៍ស្វ័យវាយតម្លៃ ✅ ការអនុវត្តបំពេញឧបករណ៍ស្វ័យវាយតម្លៃផ្ទាល់ខ្លួន ដើម្បីទុកជាទិន្នន័យមូលដ្ឋានសម្រាប់គណៈគ្រប់គ្រង ក្នុងការរៀបចំផែនការអភិវឌ្ឍវិជ្ជាជីវៈឱ្យមានប្រសិទ្ធភាព។ សិក្ខាសាលនេះ ជាឱកាសដ៏សំខាន់សម្រាប់បុគ្គលិកអប់រំគ្រប់រូប ក្នុងការឆ្លុះបញ្ចាំងពីសមត្ថភាព និងលទ្ធផលការងាររបស់ខ្លួនក្នុងរយៈពេលកន្លងមក។ តាមរយៈការធ្វើស្វ័យវាយតម្លៃនេះ មិនត្រឹមតែជួយឱ្យបុគ្គលិកម្នាក់ៗស្វែងយល់ពីចំណុចខ្លាំង និងចំណុចដែលត្រូវកែលម្អប៉ុណ្ណោះទេ ប៉ុន្តែវាក៏ជាមូលដ្ឋានគ្រឹះដ៏រឹងមាំក្នុងការកសាងធនធានគ្រូឧទ្ទេសដែលមានគុណវុឌ្ឍិខ្ពស់ ដើម្បីចូលរួមចំណែកលើកកម្ពស់គុណភាពអប់រំ និងបណ្តុះបណ្តាលគរុសិស្ស-និស្សិតឱ្យក្លាយជាគ្រូបង្រៀនប្រកបដោយវិជ្ជាជីវៈនាពេលអនាគត។

នាថ្ងៃសៅរ៍ ខែមេសា ឆ្នាំ២០២៦ វិទ្យាស្ថានគរុកោសល្យបាត់ដំបងបានរៀបចំពិធីសូត្រមន្ត សុំសេចក្តីសុខ សិរីសួស្តី ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ក្នុងកម្មវិធីសង្ក្រាន្តមហាគ្រួសារគរុកោសល្យ(BTEC) ក្រោមអធិបតីភាព ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង និងលោកជំទាវ លោកនាយករង លោកគ្រូ-អ្នកគ្រូឧទ្ទេស គរុនិស្សិត និងគរុនិស្សិតគ្រូបង្រៀនផ្អែកលើកិច្ចព្រមព្រៀងការងារនៃវិទ្យាស្ថានគរុកោសល្យបាត់ដំបង។

ត្រៀមឈុតសង្ក្រាន្តឱ្យស្អាតៗហូបបាយឱ្យច្រើនៗ ត្រៀមកម្លាំង ហើយមកជួបជុំគ្នា! ហាមខកខានណា! 🥳🔥🙌

នាព្រឹកថ្ងៃសុក្រ ១រោច ខែចេត្រ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី០៣ ខែមេសា ឆ្នាំ២០២៦ វិទ្យាស្ថានគរុកោសល្យបាត់ដំបងបានរៀបចំកម្មវិធីបិទការប្រកួតកីឡាបាល់ទះមិត្តភាពប្រចាំឆ្នាំ២០២៦។ កម្មវិធីនេះបានប្រព្រឹត្តទៅក្រោមអធិបតីភាព ឯកឧត្តម បណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង។ ឆ្លៀតក្នុងឱកាសនេះ ឯកឧត្តមនាយក ក៏បានអបអរសាទរដល់ក្រុមបាល់ទះបុរស-នារីដែលទទួលបានជ័យជំនះ និងលើកទឹកចិត្តដល់គរុនិស្សិតទាំងអស់ឱ្យមានការខិតខំប្រឹងប្រែងជាបន្តបន្ទាប់។

នាព្រឹកថ្ងៃអង្គារ ១៣កើត ខែចេត្រ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី៣១ ខែមីនា ឆ្នាំ២០២៦ លោកបណ្ឌិត ហ៊ត ស៊ីនួន នាយករងវិទ្យាស្ថានគរុកោសល្យបាត់ដំបង តំណាងឯកឧត្តមបណ្ឌិតនាយកវិទ្យាស្ថាន បានទទួលជួបសំណេះសំណាល និងពិភាក្សាការងារជាមួយលោក David Fay មន្ត្រីទទួលបន្ទុកភាសាអង់គ្លេសប្រចាំតំបន់ (Regional English Language Officer - RELO) និងប្រតិភូអមដំណើរ។ គោលបំណងសំខាន់នៃជំនួបនេះរួមមាន៖ ពង្រឹងកិច្ចសហប្រតិបត្តិការ៖ ស្វែងយល់ពីគ្នាទៅវិញទៅមក និងវាយតម្លៃលទ្ធផលការងាររបស់អ្នកស្ម័គ្រចិត្តបង្រៀនភាសាអង់គ្លេសរបស់ស្ថានទូតសហរដ្ឋអាមេរិក។ ផែនការបន្តការគាំទ្រ៖ ពិភាក្សាលើការបណ្តុះបណ្តាលគ្រូភាសាអង់គ្លេស ការចែករំលែកបទពិសោធន៍ និងវិធីសាស្ត្របង្រៀនថ្មីៗដល់គ្រូឧទ្ទេស និងគរុនិស្សិតនៅវិទ្យាស្ថាន។ ជាទីបញ្ចប់ លោកបណ្ឌិតនាយករង បានថ្លែងអំណរគុណយ៉ាងជ្រាលជ្រៅចំពោះស្ថានទូតសហរដ្ឋអាមេរិកប្រចាំកម្ពុជា ដែលតែងតែផ្តល់ការគាំទ្រដល់វិទ្យាស្ថាន ទាំងលើផ្នែកសម្ភារៈបច្ចេកទេស និងការបញ្ជូនអ្នកជំនាញការ (English Language Fellows) មកចែករំលែកបទពិសោធន៍ផ្ទាល់ ដើម្បីលើកកម្ពស់គុណភាពអប់រំនៅកម្ពុជា។

បាត់ដំបង៖ នៅរសៀលថ្ងៃចន្ទ ទី៣០ ខែមីនា ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំកិច្ចប្រជុំស្តីពីលទ្ធផលការងារសម្រេចបាន និងជូនដំណើរលោកសាស្ដ្រាចារ្យបណ្ឌិត Ravin PAN ក្រោមអធិបតីភាព ឯកឧត្ដមបណ្ឌិត ជា រដ្ឋា នាយកវិទ្យាស្ថាន និងមានការចូលរួមពីសំណាក់លោកបណ្ឌិតនាយករង លោកព្រឹទ្ធបុរស គណៈគ្រប់គ្រងដេប៉ាតឺម៉ង់ និងលោកគ្រូអ្នកគ្រូឧទ្ទេសផងដែរ។ ក្នុងរយៈពេល ៦ខែ ចាប់ពីថ្ងៃទី១ ខែតុលា ឆ្នាំ២០២៥ ដល់ថ្ងៃទី៣១ ខែមីនា ឆ្នាំ២០២៦ ក្រោមការគាំទ្រដោយកម្មវិធី Fulbright លោកសាស្ដ្រាចារ្យបណ្ឌិត Ravin PAN បានបង្ហាញពីការខិតខំប្រឹងប្រែងក្នុងការគាំទ្រដល់ការបង្រៀនគណិតវិទ្យា នៅវិទ្យាស្ថានគរុកោសល្យបាត់ដំបង តាមរយៈសកម្មភាពសំខាន់ៗដូចជា៖ រៀបចំវគ្គបណ្តុះបណ្តាលសម្រាប់គ្រូទ្ទេសគណិតវិទ្យា និងគរុនិស្សិតនៅវិទ្យាស្ថាន។ ផ្តល់ការណែនាំផ្ទាល់ និងជួយបង្កើតវិធីសាស្ត្របង្រៀនទំនើបសម្រាប់គ្រូបង្រៀននៅសាលាអនុវិទ្យាល័យអនុវត្តន៍។ ជួយបង្កើតបរិយាកាសសិក្សាដែលផ្តោតលើការយល់ដឹង និងការអនុវត្តជាក់ស្តែង។ ចែករំលែកបទពិសោធន៍អន្តរជាតិ ដើម្បីលើកកម្ពស់គុណភាពនៃការបង្រៀន និងការរៀនគណិតវិទ្យា។ កិច្ចប្រជុំនេះបានបញ្ចប់ទៅដោយបរិយាកាសរីករាយ និងស្និទ្ធស្នាល ដែលជាការចងក្រងនូវអនុស្សាវរីយ៍ល្អៗសម្រាប់សហគមន៍អប់រំ និងជាការបង្ហាញពីការដឹងគុណចំពោះការខិតខំរបស់លោកបណ្ឌិត។ វិទ្យាស្ថានគរុកោសល្យបាត់ដំបង សូមថ្លែងអំណរគុណយ៉ាងជ្រាលជ្រៅដល់លោកសាស្ដ្រាចារ្យបណ្ឌិត Ravin PAN ដែលបានខិតខំព្យាយាម និងរួមចំណែកយ៉ាងសកម្មក្នុងការលើកកម្ពស់គុណភាពអប់រំ ទាំងនៅវិទ្យាស្ថាន និងនៅសាលាអនុវត្តន៍។